Nagdepensa ang Vallacar Transit Incorporated sa mga ginareklamo sang ila mga anay empleyado.
Sa interview sang Bombo Radyo kay Moises Flores, Admin Officer sang Vallacar Transit Incorporated, iya ginpahayag nga wala sang kamatuoran ang mga alegasyon sang mga tagreklamo.
Suno kay Flores, may yara sang insurance nga ginahatag ang kompaniya apang kinahanglan sang mga empleyado nga kumpletuhon ang mga requirements agud maka-avail.
May mga empleyado pahayag ni Flores nga nagapabuyan-buyan sa pagpasa sang requirements rason nga indi ma kumpleto ang ila pagpasa sa central office sang kompaniya.
Samtang nagpaathag man si Flores may kaangtanan sa ginapahayag sang anay driver sang bus nga illegal charging sa iya sweldo bangud sa natabo nga aksidente kag pagkaguba sang unit.
Depensa ni Flores, wala sang empleyado nga ginakaltasan kun indi mismo ang driver sang ceres bus ang nakabunggo.
Apang kun ang driver sang ceres bus ang nakabunggo, may charges nga ginakuha ang kompaniya.
Dugang pa sang natungdan, ginarespeto sang kompaniya ang mga hinun-anon sang mga tagreklamo bangud ila ini kinamatarong.
Apang nagapangabay lamang si Flores nga kuntani buksan kag pasangkadon man sang mga tagreklamo ang ila paminsaron.
