Ginabalabagan sang pila ka motorcycle riders ang hagna nga ginduso ni former House Speaker kag subong Marinduque representative Lord Allan Velasco nga naga-require sa tanan nga motorcycle riders kag owners nga magpa-myembro sa Land Transportation Office (LTO)-accredited motorcycle club bilang prerequisite sa pagkuha sang bag-o nga lisensya.
Sa idalom sa sini nga House Bill (HB) 32 ukon Motorcycle Safety Riding Act, kinahanglan man nga magpa-myembro sa club agud makapa-renew sang driver’s license ukon bisan sa pag-renew sang motorcycle registration.
Sa interview sang Bombo Radyo kay Felix Serisola, former national president sang Philbikers Mosrai kag national member sang Motorcycle Philippines Federation (MCPF), iya ginpahayag nga disbentaha ini para sa mga tag-iya sang motor nga luyag lang kuntani maka-negosyo ukon nagagamit lang sang motor agud mag-trabaho.
Ginpahangop ni Serisola nga indi tanan nga riders nagabakal sang motor agud maglingaw-lingaw ukon maglibot-libot lang sa Pilipinas.
Wala man sang tyempo ang iban suno sa natungdan agud nga mag-upod sa sini nga buddies ukon sa riding club.
Ang maka-benepisyo lang sa sini nga hagna suno kay Serisola amo ang mga riders nga myembro na nga daan sang established na nga riding group.
Kun magpa-myembro sa riding club, masami suno kay Serisola nga gina-require ang tag-iya sang motor nga magpasa sang driver’s license, OR CR ukon LTO Official Receipt kag Certificate of Registration.
Nagalaum ang natungdan nga ikonsiderar man sang mga mamalidha ini nga mga indibidwal antes ipasar sa layi ang amo nga hagna nga pending subong sa Kamara.
IBAN PA NGA REAKSYON
Kun mahimo ini nga layi suno sa motorcycle riders, daw kaangay lang nga ginapatawan sila sang pressure kag ginadingutan sang ila nga kahilwayan.
Sa interview naman sang Bombo Radyo kay Jessie Pineda, iya ginpahayag nga awat sini sa tyempo para sa iban nga indi man gusto magpamyembro sa riding club. Nagpahayag man si Pineda nga ginduso ini sang tawo nga indi man rider, kag posible suno sa iya nga luyag lang nila nga maka-kuwarta ang Land Transportation Office (LTO).
Nagalaum man ang natungdan nga antes ini himuon nga layi, tun-an ini sang maayo sang mga mamalidha kag magpatigayon man sang konsultasyon sa maapektuhan nga sektor ilabi na ang motorcycle riders.
Suno pa sa isa ka delivery rider nga si Jade Nabajo nga may trabaho sa syudad sang Iloilo, posible pa nga madulaan sila sang trabaho kun ipatuman ini nga hagna bangud indi man sila magpamyembro sa riding club. ##
