Nag-ugtas liwat si Senator Cynthia Villar sa mga opisyal sang Department of Agriculture (DA) bangud sa nagasulubra nga importasyon.
Kasunod sang iya pagkwestyon sa Bureau of Animal Industry (BAI) bangud sa sobra nga importasyon sang karne, sunod nga ginlaslasan sang senador ang mga opisyal sang ahensya bangud pag-import sang yellow corn kag feed wheat.
Sa senate hearing sang Senate Committee on on Agriculture, Food and Agrarian Reform, ginpahanumdom ni Villar sa mga opisyal sang DA nga gina-tag na sila sang publiko nga “Department of Importation” bangud sa kakulang sang developmental programs para sa local farmers kag sa padayon nga pagsalig na lamang sa importasyon.
Pahayag ni Villar, mandato sang DA nga makahimo sini nga mga programa agud may bastante nga suplay sa Pilipinas nga yara man sa competitive price.
Ginpahayag man sini nga indi mandato sang ahensya nga manghatag na lang nga manghatag sang import permit kun may yara sang gusto nga mag-import bangud kabuhi sang local farmers ang dapat nga pauswagon kag indi indi iya sang importers.
Sa amo nga hearing, ginpresentar ni Villar ang data nagikan sa Philippine Statistics Authority sa suplay kag demand sa mais halin sang 2019 tubtub sang 2022.
Sa amo nga data, ginpahayag nga naga-import ang Pilipinas sang yellow corn kag feed wheat halin 2019-2022 kag may yara na sang surplus sang sini nga produkto magluwas sa 2022. ##
