Gin-athag ni Ajuy, Mayor Jett Rojas nga wala nila ginapilit ang mga pumuluyo nga i-surrender ang ila nga home quarantine pass kabaylo sang relief goods.
Sa interview sang Bombo Radyo kay Rojas, iya ginpahayag nga hugot nila nga ginapatuman sa ila nga banwa ang Voluntary Stay at home campaign agud maprotektahan ang mga pumuluyo batok sa halit ang Covid-19.
Suno kay Rojas, mahimo nga makapili ang mga pumuluyo kun luyag nila nga magpabilin sa ila nga balay sa diin ihatag nila ang ila home quarantine pass sa mga opisyal sang barangay sa baylo nga hatagan sila sang relief goods nga ginalakipan sang bugas kag uga ukon magpadayon sila sa ila nga trabaho apang indi na sila malakip sa mga makabaton sang ayuda gikan sa Local Government.
Dugang sang natungdan, ginatugutan man nga makagwa ang mga pumuluyo agud makapamalaklon sang ila mga kinahanglanon apang isa lang kada household ang mahimo makgwa.
