Nanawagan si Vice President Leni Robredo sa gobyerno, ilabi na sa kongreso nga taasan ang alokasyon sang pondo para sa science and technology.
Ini matapos ang nangin pahayag ni Presidente Rodrigo Duterte nga dugangan niya sang P50-milyon ang padya para sa mga Pilipino nga makadiskubre sang bakuna ukon bulong batok sa COVID-19.
Suno kay Robredo, mas maayo kun mag-invest ang gobyerno sa science kag technology bangud maathag nga sa tunga sang krisis nga kaangay sang ginapangatubang sang pungsod subong mas mahatagan sang atensyon ang importansya sang siensya.
Dugang sang natungdan, pat-ud niya nga kulang ang suporta nga ginahatag sang gobyerno sa mga Pilipino nga eksperto kag scientists.
Madumduman nga una na nga nanawagan ang pila ka mga mamalidha sa presidente nga sa baylo nga maghatag sang padya sa makadiskubre sang bulong, italana nalang ini nga pondo para sa mga pagpanalawsaw.
Nahibaluan nga subong nga tuig 2020, nakabaton sang masobra P20 bilyon nga pondo ang Department of Science and Technology sa idalom sang General Appropriations Act.
Una naman nga ginpahayag sang Department of Budget and Management nga halos P200 bilyon pa ang unreleased appropriations gikan sa fiscal year 2019-2020 nga mahimo gamiton batok sa COVID-19.
Nalakip man ang DOST sa nakabaton sang P5.182 bilyon nga cash allocations.
