Nagsaka na sa walo ka tawo ang nagkalamatay bangud sa pag-ulan kag pagbaha sa pila ka mga rehiyon sa Pilipinas nga gintuga sang shear line.
Sa latest report sang Office of the Civil Defense, duha sa mga napatay ang nagikan sa Bicol region samtang anum naman ang naghalin sa Northern Mindanao.
Tatlo naman ang reported nga napilasan, samtang 19 ang ginpahayag nga missing.
Sa 19 nga missing, 10 ang nagikan sa Bicol, anum ang halin sa Eastern Visayas kag tatlo ang halin sa Northern Mindanao.
Linibo man ang napilitan nga mag-evacuate kadungan sang Paskuwa.
Suno naman sa 7pm situation report sang National Disaster Risk Reduction and Management Council, Disyembre 26, apektado sang baha ang 100,691 ka tawo ukon 27,133 ka pamilya sa Mimaropa, Bicol, Eastern Visayas, Northern Mindanao, kag Caraga regions.
Ini nga pagbaha ang nagtuga man sang masobra P59 million nga balor sang halit sa agrikultura kag masobra P14 million nga balor sang halit sa imprastraktura.
