15-day ECQ extension sa probinsya sang Iloilo, wala sang mangin problema sa pagpatuman sang exit plan sa syudad sang Iloilo

ILOILO CITY – Mangin amat-amat lang ang pagpauntat sang Enhanced Community Quarantine sa syudad sang Iloilo.

Ini ang nangin sabat ni Iloilo City Mayor Jerry Treñas sa nangin desisyon ni Iloilo Gov. Arthur Defensor Jr. nga magpatuman sang 15-day lockdown extension sa probinsya sang Iloilo umpisa Mayo 1.

Sa interview sang Bombo Radyo kay Treñas, iya ginpahayag nga naka-istoryahanay sila ni Gov. Defensor kag nahisugtan nga wala sang mangin problema sa igapatuman sang lockdown extension kag sang exit plan.

Suno kay Treñas, amat-amaton lang ang pagdula sang restrictions may kaangtanan sa lockdown bangud nga indi man madali-dali ang pagdula sang Enhanced Community Quarantine para sa seguridad sang kadam-an.

Ginpahayag ni Treñas sa subong, nahisugtan nila ni Gov. Defensor nga magpahamtang sang dugang nga laboratory testing centers para nga mas madamo ang maakomodar nga specimen.