ILOILO CITY- Wala nagabag-o ang mga pagpanghangkat nga ginapangatubang sang Department of Education samtang nagahilapit ang pagbukas sang klase.
Sa interview sang Bombo Radyo kay Dr. Ernesto Servillon Jr., Schools Division of Iloilo Superintendent, iya ginpahayag nga kakulang sa learning materials, manunudlo kag classrooms ang pila sa mga problema sa sulod sang eskwelahan.
Suno kay Servillon, may yara sang 45 ka mga estudyante ang naga-okupar sa kada isa ka classroom sa diin nagalaum kuntani sila nga mapanubo ini sa 20 tubtob 25 ka mga estudyante agud nga matutukan sang mga manunudlo.
Sa probinsya sang Iloilo, may yara pa sang 1,652 ka mga classrooms nga kinahanglanon sa 409 ka mga eskwelahan.
Pahayag niya, bangud sa kakulang sang classrooms, nagapangita anay ang Schools Division of Iloilo sang temporary learning spaces ukon mga existing structures nga mahimo gamiton agud nga maka-lecture ang mga manunudlo.
Dugang pa sang natungdan, apisar sa mga kakulangan, yara man ang mga local government units nga nagabulig sa mga eskwelahan ilabi na sa Iloilo Provincial Government sa liderator ni Governor Arthur Defensor Jr. nga may yara sang Special Education Fund para sa pagpatukod sang dugang nga classrooms kag iban pa nga mga school facilities.
Magluwas sina dugang ni Dr. Servillon, nagabulig man ang Provincial Government sa pag-hire sang mga manunudlo nga tuman nga kinahanglanon.
Sa pihak sang mga pagpanghangkat, preparado na ang Schools Division of Iloilo sa pagbukas sang klase sa Agosto 29.
