Nagdangat sa lima ka oras ang negosasyon sang pulis kag responders sa Project 5, Barangay Sooc, Arevalo, Iloilo City matapos gin-hostage sang 31-anyos nga lalaki ang iya kaugalingon.
Ini amo si alias Ervin, wala sang asawa, kag naga-trabaho anay bilang delivery rider.
Armado siya sang kutsilyo sang ginhimo sini ang self-hostage.
Pasado alas-12 sang udto kahapon sang nag-umpisa ang pagwala ni Ervin apang pasado na alas singko sa hapon kag natigayon gid man nga napapanaog ini sa ila nga balay paagi sa Special Weapons and Tactics (SWAT) sang Philippine National Police (PNP).
Sa interview sang Bombo Radyo kay Police Captain Michael Tuburan, Officer-in-charge sang Iloilo City Police Station 6, iya ginpahayag nga nagpanirado sang ila balay si Ervin kag ginapahayag nga nagpamahog nga pilasan sini ang iya kaugalingon kun may magsulod.
Suno kay Tuburan, bisan sila nga mga pulis ang ginahaboy man sang botelya kun magpalapit sila sa lalaki.
Dugang pa ni Captain Tuburan, naga-gwa sa inisyal nga impormasyon nga masobra duha ka adlaw na nga wala nakakaon kag nakatulog sang maayo si Ervin.
Ginalantaw man nga nakaapekto pa gid sa iya kondisyon ang sobra nga paghampang sang online game nga Mobile Legends (ML).
Sang gina-istorya nila ini suno kay Tuburan, nakapanugid man si Ervin nga nagapangayo siya kuntani sang motor kag computer sa iya nga iloy apang wala ini nahatag.
Nahibaluan nga ang iloy lamang sini nga yara sa luwas sang pungsod amo ang naga-sustento kay Ervin para sa iya nga mga kinahanglanon samtang yara naman sa iban nga lugar ang iya Lolo kag Lola.
Gindala anay si Ervin sa Police Station VI agud nga ipaidalom sa psychological evaluation.#
