Narusdak, naglupad ang mga atop, kag natumbahan sang kahoy ang pila ka mga balay sa Brgy. Cubay, Jaro, Iloilo City kasunod sang buhawi pasado alas dies kagab-i.
Sa interview sang Bombo Radyo kay Barangay Secretary Berry Roncal, iya ginpahayag nga ang Sitio Dike amo ang pinakaapektado nga area sa ila barangay.
Kabug-usan nga 58 ka mga pamilya nga katumbas sang 132 ka mga indibidwal ang ginpang-evacuate bangud sang epekto sang amo nga buhawi.
Magluwas nga may naguba nga mga balay, may natumba man nga mga puno sang kahoy kaangay sang acacia, paho, kag mahogany.
Ginpakigbahin naman sang isa ka residente nga si Monica nga nag-usmod ang ila balay. Wala sang may nasamaran sa ila pamilya, apang gilayon na sila nga nagsaylo sa barangay kag nagpaligad sang gab-i.
Kabahin ang Barangay Cubay sa pinakaapektado sa amo nga buhawi kagab-i.
Base sa latest assessment sang Iloilo City Government, 81 ka mga pamilya ang apektado sa syudad kun sa diin may 20 man sa Benedicto, Jaro; anum sa Balabago, Jaro; kag isa sa Gustilo, La Paz.
Sa amo nga initial report, 52 ang na-damage nga mga balay kun sa diin 48 gid ang yara sa Barangay Cubay.
Subject pa ini sa validation kag verification sang City Social Welfare and Development Office (CSWDO), gani posible pa nga magbag-o ang numero.#
