ILOILO CITY – Indi magnubo sa 320 ka mga Filipinos nagikan sa Sudan ang yara na subong sa mga shelters kag hotels sa Egypt kag nagahulat lamang sang repatriation pauli sa Pilipinas.
Suno kay Foreign Affairs Undersecretary for Migrant Affairs Eduardo Jose de Vega, wala na sang Filipino nga naipit sa border sang Egypt kag Sudan.
Dugang pa niya, target sang ahensya, dapat nga makauli na ang tanan subong nga semana.
Samtang, masobra naman sa 50 ka mga Filipinos nagikan sa Port Sudan ang nakalab-ot na sa Saudi Arabia.
Ang Saudi Arabia ang nagpadala sang military vessels para mag-evecuate sang mga tawo sa Sudan.
Suno kay De Vega, 179 na ka mga Filipinos nagikan sa Sudan ang natigayon nga mapapauli sa pungsod.
Apang, ginpahayag niya nga may yara sa gihapon sang indi magnubo sa 100 ka mga Filipinos nga nagapabilin sa Sudan.
Ang mga Filipino naman nga gusto nga magtrabaho sa iban nga pungsod ang indi na kinahanglan nga i-repatriate kun may yara na sila sang working visa.
Nahibaluan nga ginatos na ang napatay sa kinagamo sa tunga sang duha ka mga pwersa nga ginapamunuan sang de facto leader sang Sudan nga si Abdel Fattah al-Burhan nga amo ang nagapamuno sa regular army, kag sang iya deputy-turned-rival Mohamed Hamdan Daglo nga amo naman ang nagamandu sa paramilitary Rapid Support Forces.
