Ginalantaw sang Department of Science and Technology (DOST) nga magalab-ot sa 49 ka mga probinsya ang maga-eksperyensya sang below-normal nga pag-ulan sa Oktubre kadungan sang pagtuhaw sang “very strong” El Niño.
Suno kay Science Secretary Renato Solidum Jr., kadam-an sang maapektuhan nga probinsya ang nahamtang sa Visayas kag sa Mindanao.
Ginabanta nga 41% lamang ukon tubtub sa 80% lang sang average ang mabatyagan nga pag-ulan.
Pagka-Nobyembre, may areas naman sa Northern Luzon nga maka-eksperyensya sang way-below-normal rainfall nga 20% lang sang average.
Nagpaandam man ang ahensya nga ang mga mangunguma amo ang mangin pinaka-apektado sa mabaskog nga El Niño phenomenon sa Oktubre tubtub sa Nobyembre.
Bangud wala sang ginapaabot nga tubig sa sini nga binulan, gina-abisuhan ang mga mangunguma nga isaylo ang ila schedule sang planting season ukon siguruhon anay nga may maayo nga irigasyon sa tagsa ka lugar.
Una na nga gin-report sang Philippine Atmospheric, Geophysical and Astronomical Services Administration nga may 92 percent nga tyansa nga mabatyagan na ang mahina pa lang nga El Niño sa Hunyo tubtub Agusto; mangin strong ukon mabaskog sa Septyembre tubtub sa Nobyembre; kag may 30% nga tyansa nga mas magbaskog pa gid ukon makadangat sa “very strong” sa October to November window.
