JAPAN – Magasugod na sa masunod nga semana nga managtag ang Japanese government sang mga reusable cloth mask sa kada panimalay sa bilog nga pungsod.
Una nga makabaton sang face masks ang mga panimalay sa Tokyo kag iban pa nga lugar nga may yara sang madamo nga kaso sang Coronavirus Disease 2019.
Suno sa health ministry sang Japan ginabanta sa 58.5 milyon ka mga panimalay ang mahimo makabaton sang face masks.
Lakip man sa mga ipanagtag amo ang leaflet sa diin makit-an ang mga impormasyon may kaangtanan sa insakto nga paghugas sang masks.
Nagdangat naman sa halos 430 milyon dollars ang pagagamiton sang Japanese government sa diin tunga diri ang nagikan sa nakatalana nga pondo samtang ang tunga naman ang lakip sa ginpirmahan nga supplementary budget subong nga tuig.
Ginaplano man sang health ministry nga magpadala sang 130 milyon cloth masks para sa mga tigulang nga yara sa care facilities kag sa mga nagabusong.
