Lalaki nga ginbulagan sang live-in partner, nanggamo sa brgy. hall kag simbahan

ILOILO CITY – Preso ang isa ka lalaki sa Sinikway, Lapuz, Iloilo City, nga nagpanggamo matapos nga bulagan sang iya live-in partner.
Ginpahayag ni Barangay Kagawad Jing Espinosa Sr. nga ginpangguba ni Alvie Poblacion ang mga gamit sa barangay hall, kudal sang simbahan kag ginlambatan ang trisikad nga ginsakyan sang iya anay karelasyon nga si Rose kag ginguyod ang babaye.
Sa interview sang Bombo Radyo, tuman ang paghinulsol ni Poblacion.
Gin-ako sang suspek nga naakig siya sa pagbulag sa iya sang live-in partner.
Suno naman kay Rose, nagdesisyon siya nga bayaan ang anay karelasyon bangud nagapabungol lang apesar iya ginapauntat sang inom.
Si Poblacion ang yara sa drug watchlist sang barangay.