Alleged serial rapist naaresto matapos mang-karnap kag mang-abduct sa mall

ILOILO CTY – Naaresto na ang ginaalegar serial rapist sa Iloilo nga madugay na wanted sa mga otoridad, matapos nga nangkarnap kag nang-kidnap sa carpark sng SM City Mall kagab-i sa Benigno Aquino Avenue, Mandurriao, Iloilo City.
Gin-abduct sang mga suspek nga sanday Sirius Jim Villareal, 22, Raymond Cordero, 22, kag isa pa nila nga kaupdanan, ang magnobyo nga Mark Emil Jocson kag Queenie kag gintaban ang salakyan sang mga biktima nga amo man ang gingamit sang mga suspetsado bilang getaway vehicle.
Sa interview sang Bombo Radyo Iloilo, ginpahayag ni Jocson, 22, sang Barangay Banuyao, La Paz, Iloilo City, nga sa sulod na sila sang salakyan sang gintayaan sila sang armas sang mga suspek.
Gin-blind fold ang mga biktima, gingapos sang duct tape kag samtang yara sa sulod sang salakyan, ginmolestiya sang mga suspek si Queenie.
Nagpangayo ang mga suspek sang P3 million nga ransom kag gikan sa mall, gindala ang mga biktima sa fifth district sang Iloilo.
Nagpakuno-kuno si Queenie nga nauhaw ini, rason nga nag-agi ang mga suspek sa isa ka convenience store sa Banate, Iloilo para magbakal sang tubig samtang si Villareal ang nagbakal pa gid sang condom.
Ginhingalitan ini sang biktima para magpalagyo kag nagpangayo sang bulig sa mga otoridad.
Sa ginpatigayong nga hot pursuit operation, nadakpan ang mga suspek sa Barangay Puerto Princesa, Barotac Viejo, Iloilo.
Gin-ako sang mga suspek nga nagkadto sila sa siyudad para mang-karnap sang salakyan.
Sa interview sang Bombo Radyo, ginpahayag sang suspek nga si Raymond Cordero nga gusto nila maka-kuwarta paagi sa ransom.
Ginpahayag sang hepe sang Ajuy PNP nga si C/Insp. Charlie Sustento nga nagbulig sa pagdakop sa mga suspek, nakuha sa mga suspek ang mga armas kag bala, kalakip na ang condom nga ginbakal ni Villareal para sa malain nga tuyo sa biktima nga babaye.
Si Villareal nga anay seaman, ang madugay na nga wanted sa mga otoridad bangud sa kaso nga rape nga ginapangatubang sini.
Ginapahayag nga modus ni Villareal nga pasakayon ang mga babaye sa ila salakyan kun sa diin niya ang mga ini ginahimuslan.