Ginkumpirma sang chief of staff ni Iloilo City Lone District Congressman Jerry Treñas nga ginpangayuan sila sang P100 million sang kampo ni Iloilo City Mayor Jose Espinosa III agud gamiton sa eleksyon.
Sa exclusive interview sang Bombo Radyo kay anay punong barangay Jonas Belocello, iya ginpahayag nga ginpatawag ini ni Iloilo City First Lady Gina Sarabia Espinosa kag ginhambalan nga mangayo sila sang P100 million kabaylo sang pag-endorso sang iya bana nga si Mayor Espinosa kay Cong. Treñas bilang mayoralty candidate samtang magapadalagan naman sa pagka-kongresista si Espinosa.
Suno kay Belocello, matapos ang ila pag-istoryahanay sang misis sang alkalde, iya gilayon nga ginpahibalo ini sa kongresista.
Apang suno kay Belocello, nagpamalibad si Cong Treñas bangud wala ini sang may ginakaptan nga nasambit nga kantidad.
Gin-athag man sang natungdan nga indi ini sigurado kun may ara ini sang na-save nga text message halin sa kampo sang alkalde bangud ini ang natabo isa ka tuig na ang nagligad.
