ILOILO– Indi masabat ukon mahimo nga aprobahan sang Department of Interior and Local Government ang petisyon nga ipasa sang sidewalk vendors may kaangatan sa ginapatigayon nga Oplan Hawan.
Nahibaluan nga natalana nga magpasa sang petisyon ang sidewalk vendors nga nagahingyo nga hatagan sila sang konsiderasyon sa pagbaligya sa higad sang dalan sa kondisyon nga indi sila mangin sablag sa dalan.
Sa interview sang Bombo Radyo kay City Department of Interior and Local Government Officer Roy Defiño, iya ginpahayag nga wala siya sang kinamatarong agud sabton ukon aprobahan ang nasambit nga petisyon.
Suno kay Defiño, nakasaad sa ordinansa kag sa memorandum ni Presidente Rodrigo Duterte nga limpyuhan ang mga dalan kag pangkakason ang mga sablag rason nga indi mahimo nga pahanugutan ang ginapangayo sang sidewalk vendors.
Tun-an niya suno kay Defiño kun kay sin-o napatuhoy ang ipadala nga petisyon kag kun mahimo, iya ini nga igapasa sa Department of Interior and Local Government para sa review.
Sa pihak sini, gin-athag ni Defiño nga apisar ipadala sa nasambit nga ahensya ang petisyon, wala man siya sa gihapon sang kinamatarong nga aprobahan ang hingyo sang sidewalk vendors santo sa ordinansa.
Nauna na nga ginpahayag ni Jimmy Durado, presidente sang Iloilo City Sidewalk Vendors Association, ginahulat pa niya si Punong Barangay Woody Delariarte nga amo ang magabulig sa ila agud makasulat sang pormal nga petisyon.
