ILOILO– Indi mauntat ang hilibion sang isa ka tigulang sang nasapwan patay ang iya nga bana nga nagahapa sa dalan kag may igo sang bala sa ulo kag sa nagkalain-lain nga parte sang lawas sini sa Brgy. Cabugao Norte, Sta.Barbara Iloilo.
Ang biktima ginkilala si Jilcito Bacanto, 72 anyos residente sang nasambit nga lugar.
Sa interview sang Bombo Radyo kay Rosalinda Bacanto, asawa sang biktima iya ginpahayag nga nagpadulong lang kun tani ang iya bana sa banwa agud maninda kag magbakal sang mais apang gin tiro ini sang ginapahayag riding in tandem sang ini ang nagapauli na.
Samtang suno kay Police Staff Sgt. John Derson Sabio imbestigador sang Sta. Barbara Municipal Police Station, base sa imbestigasyon gina alegar away sa duta ang motibo sang nasambit nga krimen.
Dugang ni Sabio, nagpablotter pa ang biktima kahapon nga adlaw matapos ini makabaton sang death threat bangud sa pagpamahog ni certain Levy Cain nga kun padayunon nila ang pagpanggas sang duta may malain nga matabo sa ila.
Nahibaluan nga may yara sang ginapanggas nga mais ang biktima sa duta sang abogado nga si Atty. Del Rosario apang suno sa asawa ang duta gina claim man nanday Jimmy Suala kag Lanie Solas.
Suno pa sa natungdan, napasibangdan lang sila nga gina kuha ang nasambit nga duta apang ginklaro niya nga ini ang ginpatamnan lang sa ila ni Atty. Del Rosario.
Sa subong, padayon ang ginapatigayon nga imbestigasyon sa nasambit nga krimen.
