ILOILO – Ginpabugal ni Iloilo City Lone District Rep. Jam-Jam Baronda ang iya mga accomplishment sa iya ika 100 nga adlaw sa serbisyo.
Sa interview sang Bombo Radyo kay Baronda, iya ginpahayag nga 21 ka mga hagna na ang iya ginduso samtang 26 ka hagna ang iya gin co-author.
Suno kay Baronda, isa sa mga hagna nga iya ginduso amo ang Act of Increasing Bed Capacity of Western Visayas Medical Center kun sa diin 400-700 ka hospital beds ang igadugang lakip man ang dugang nga staff kag personnel sa nasambit nga hospital.
Ginpahayag ni Baronda nga napasa na sa komitiba ang nasambit nga hagna kag ginatinguhaan nga maduso sa plenaryo.
Dugang pa sang natungdan, nagduso man siya sang hagna tuhoy sa pagpaayo sang transaksyon kag serbisyo sa Land Transportation Office lakip man ang paghatag sang bulig sa mga operator sang motorized bangka kag e-trike.
Samtang, gin isa-isa man ni Iloilo Governor Arthur Defensor Jr. ang iya nangin accomplishment sa sulod sang 100 ka adlaw nga pagserbe bilang gobernador sang probinsya sang Iloilo.
Sa interview sang Bombo Radyo kay Defensor, iya ginpahayag nga masadya ang iya trabaho sa sulod sang 100 ka adlaw.
Suno kay Defensor, nagapati siya nga nahatagan niya sang nagakaigo nga solusyon ang mga problema sa probinsya kaangay na lang sang Dengue Hemmorhagic Fever nga amat-amat na nga nagnubo ang kaso, ang epekto sang Rice Tarrification Law sa mga mangunguma kun sa diin nakahatag sang bulig ang probinsya kag ang African Swine Fever scare.
Dugang pa sang natungdan, iya nga pasangkaron ang paghatag sang serbisyo agud nga madamo pa nga pumuluyo ang mabuligan.
