ILOILO – Nagapati si Senate Minority Leader Franklin Drilon nga nagakadapat na nga magretiro sang mas temprano si Philippine National Police Chief Oscar Albayalde apisar nga may isa pa ka bulan nga nabilin antes ang iya retirement.
Sa interview sang Bombo Radyo kay Sen. Drilon, iya ginpahayag nga makabulig ang early retirement ni Albayalde agud mas madasig nga makabangon gikan sa kahuy-anan ang Philippine National Police tuga sang ‘Ninja Cops’ controversy.
Kumbinsido si Drilon nga mabaskog ang testimonya nga ginbuy-an sang mga witness sang Senado tuhoy sa nasambit nga kontribersiya.
Ginpahayag ni Drilon nga may cover-up nga nagakatabo agud nga indi mahibalu-an nga naangot si Albayalde sa ‘Ninja cops’.
Nahibaluan nga una na nga ginpahayag ni Cabinet Secretary Karlo Nograles nga nagmandu si Pres. Rodrigo Duterte nga patapuson anay ang hearing sa senado tuhoy sa ‘ninja cops’ kun sa diin igapresentar ang nagkalain-lain nga witness antes makapatigyon sang imbestigasyon ang Department of Justice kag Department of Interior and Local Government.
