ILOILO CITY – Ginpasiguro ni Liga ng mga Barangay President Irene Ong nga masunod sang mga barangay official ang ginpaguwa nga memorandum ni Iloilo City Mayor Jerry Treñas kag sang Department of Interior and Local Government tuhoy sa re-evaluation sang road clearing operations.
Sa interview sang Bombo Radyo kay Ong, iya ginpahayag nga iya pagahatagan sang kopya sang memorandum ang tagsa ka punong barangay agud nga ila mahangpan kun ano ang kaundan sini.
Suno kay Ong, sa bulan sang Disyembre, may yara sang re-evaluation nga matabo rason nga kinahanglan nga makuha na ang tanan nga sablag sa dalan.
Ginpahayag ni Ong nga santo sa bag-o nga memorandum sang ahensya, sakop sang clearing operations ang mga barangay road.
Nahibalu-an nga sa evaluation, nakakuha lamang sang medium compliance ang syudad sang Iloilo sa Oplan Hawan.
