ILOILO CITY – Mangin libre sa sulod sang isa ka tuig ang pagtinir sang sidewalk vendors sa Cacho Property sa JM Basa St., Iloilo City.
Sa interview sang Bombo Radyo kay Mr. Mikel Afzelius, Communications Officer sang Panay Electric Company, iya ginkumpirma nga indi magsukot ang pamilya Cacho sang renta gikan sa mga manugbaligya nga naga amat-amat pa lang sa pagbawi sang ila kita.
Suno kay Afzelius, ini ang ila bulig sa mga manugbaligya ilabi na gid nga wala pa naanad ang mga manugbakal sa pagpadulong sa Cacho Property.
Ginpahayag ni Afzelius nga iya pa nga hibaluon kun bala may yara na sang Memorandum of Agreement sa tunga sang pamilya Cacho kag sang Iloilo City Government.
Apisar nga libre na ang pagpatinir sa sidewalk vendors, ginahingyo nila sa suno kay Afzelius sa Iloilo City Government ang pagpabilin sang katinlo sa lugar.
Wala man ginadula ang posibilidad nga pahamtangan sang permanente nga estruktura ang lugar agud marentahan sang mga manugbaligya sa barato nga presyo.
Nahibaluan nga sang Setyembre ginsaylo ang sidewalk vendors sa Cacho Property bangud sa road clearing operations.
