CONCEPCION, ILOILO – Nakabangon na ang banwa sang Concepcion, Iloilo, anom ka tuig matapos nga naglaslas ang bagyong Yolanda kun sa diin madamo ang nadulaan sang balay kag palangabuhian.
Sa interview sang Bombo Radyo kay Concepcion, Iloilo Mayor Raul Banias, iya ginpahayag nga madasig nga nakabangon ang ila nga banwa bangud man sa nagkalain-lain nga private kag public organizations kag iban pa nga mga indibidwal nga nagapalab-ot sang bulig sa ila.
Suno kay Banias, madamo na sang mga pumuluyo nga na biktima sang bagyo ang nahatagan sang housing unit apang may yara pa sang 542 ka units nga bakante bangud substandard.
Ang nasambit nga unit ang proyekto sang National Housing Authority kag ang Hercar Constructions ang kontraktor.
Tatlo na ka tuig sang ginsugudan ang proyekto apang wala pa ini sa gihapon natapos bangud may yara pa sang basic facilities nga padayon nga gina-ubra kaangay sang septic tanks.
