ILOILO CITY – Dako nga palaligban para sa Crisis Intervention Unit kun paano mapabalik-pauli sa ila lugar ang mga Badjao nga naga liho-liho sa syudad sang Iloilo.
Sa interview sang Bombo Radyo kay Ms. Rara Ganzon, pinuno sang Crisis Intervention Unit, iya ginapahayag nga isa sa ginatudlo nga rason kun nga-a nagabalik sa gihapon ang mga Badjao agud magpangayo-kayo sa dalan amo nga padayon man nga nagahatag ang mga pumuluyo sa ila.
Suno kay Ganzon, luyag nila nga mas pabaskugon ang kampanya sa pagdumili sa paghatag sang kwarta sa mga Badjao agud indi na sila magbalik.
Naghingyo man sang bulig si Ganzon sa mga pumuluyo nga butangan sang limitasyon ang pagkamabinuligon agud indi na magbalik pa ang mga Badjao bangud madamo ang posible nga matabo samtang yara sila sa gihapon sa tunga sang dalan ilabi na ang mga kabataan.
Dugang pa sang natungdan, magapatigayon sila sang pagsinapol kaupod si Iloilo City Mayor Jerry Treñas kag iban pa nga ahensya sang gobyerno kaangay na lang sang Department of Social Welfare and Development agud istoryahan ang long term solution sa nasambit nga problema.
