ILOILO CITY – Magapahamtang sang Traffic Discipline Zone sa palibot sang syudad sang Iloilo ang Public Safety and Transportation Management Office umpisa sa masunod nga tuig.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga magapadayon pa ang pagsinapol kaupod ang Highway Patrol Group kag Land Transportation Office tuhoy sa pagpahamtang sang Traffic Discipline Zone.
Suno kay Conlu, una nga gintumod nga mangin Traffic Discipline Zone amo ang Sen. Benigno Aquino Jr. Avenue ukon mas kilala nga Diversion Road sa distrito sang Mandurriao.
Ginpahayag ni Conlu nga ang nasambit nga plano ang ginmandu mismo ni Iloilo City Mayor Jerry Treñas agud nga madisiplina ang mga motorista nga naga-agi sa nasambit nga dalan.
Kun maplastar na ang tuhoy sa pagpahamtang sang Traffic Discipline Zone, magasunod naman ang pagpahamtang sang mga Close Circuit Television Camera sa mga dalanon sa palibot sang syudad para sa monitoring.
