HONGKONG – Amat-amat na nga nag-ayo ang sitwasyon sa Hongkong kun ipaanggid sang una, ini sa pihak sang nagapadayon nga COVID-19 scare.
Sa interview sang Bombo Radyo kay Jing Banderado Gabiazon, Overseas Filipino Worker direkta sa Hongkong iya ginpahayag nga wala na sang panic buying sa Hongkong bangud bastante na ang supply sang mga balaklon.
Suno kay Gabiazon, may yara naman sang bastante nga supply sang mask nga mahimo nila mabakal.
Sa subong ginakabalak-an sang mga Pilipino sa Hongkong amo ang posible nga indi sila makapauli subong nga summer sa Pilipinas ilabi na nga may yara na sang nag dugang nga duha ka kaso sang COVID-19 sa pungsod.
Ini bangud posible nga ma stranded sila sa Pilipinas kun magpauli pa sila.
Dugang sang natungdan, madamo na sang mga Pilipino ang nagkansela sang ila bakasyon kag mas ginpili nga magpabilin nalang sa Hongkong.
