ILOILO CITY – Ginpirmahan na ni Iloilo Governor Arthur Defensor Jr., ang Exuctive Order No. 028-B nga maga implementa sa dugang Disease Control Measures agud maprotekahan ang probinsya sang Iloilo batok sa pagpamahog sang Coronavirus Disease 2019.
Sa interview sang Bombo Radyo kay Gov. Defensor, iya ginpahayag nga kabahin sang Disease Control Measures nga ipatuman sa probinsya sang Iloilo sa sulod sang 45 ka adlaw amo ang pagpa-iway sang mga large scale events nga masami ginatambungan sang madamo nga tawo kaangay sang fiesta sa mga kabanhawanan kag kabarangayan, alumni homecoming kag iban pa nga mga pagtilipon.
Suno kay Defensor, paagi sa ginpapanaog niya nga mandu temprano pa nga malikawan ang paglapta sang COVID-19 sa probinsya.
Dugang sang natungdan, mas maayo nga subong palang makapangudal na ang probinsya batok sa nasambit nga balatian agud indi na ini maglapta pa kag maapektuhan ang mga pumuluyo.
Santo man sa pahayag sang gobernador, ginamonitor naman nila subong ang pagsaka sang kaso sang nasambit nga virus sa pungsod.
Nahibaluan nga una na nga ginpakansela ni Gov. Defensor ang pagpatigayon sang graduation kag recognition sang mga estudyante sa probinsya sang Iloilo.
Ginkansela naman ang Western Visayas Regional Athletic Association Meet 2020 sa Aklan bangud sa nasambit nga health scare ilabi na nga nagtaas sa 33 ang nagpositibo sa COVID-19.
