ILOILO CITY – Nag-apelar si Iloilo City Mayor Jerry Treñas sa Department of Health 6 nga tugutan na nga ipaidalom sa testing ang mga Persons’s Under Monitoring kag Persons Under Investigation sa Western Visayas lakip man ang mga naka close contact sang mga pasyente nga nagpositibo sa COVID-19.
Sa interview sang Bombo Radyo Iloilo kay Mayor Treñas, iya ginpahayag nga indi niya ma pat-ud kun ngaa wala sa gihapon ginatugutan sang Department of Health 6 nga ipaidalom na sa testing ang mga PUM kag PUI apisar nga may yara na sang available nga mga test kits.
Suno kay Treñas, ini man ang ginaduso niya agud mahibaluan kun pila na ang numero sang kumpirmado nga kaso sang Coronavirus Disease 2019 sa Iloilo agud makabalay na sila sang mga lihok agud matapna ini.
Dugang sang natungdan, nagademand man siya sa Department of Health nga maghatag na sang Personal Protective Equipment para sa mga doktor sa tanan nga ospital sa Iloilo.
Wala na kuntani kita nagahingyo sa nasambit nga ahensya suno kay Treñas bangud ini ang ila nga katungdanan.
Suno sa alkalde, indi ini tion agud pabay-an ang mga doktor kag iban nga mga frontliners sa baylo nga nagakadapat sila nga buligan.
Kun padayon pa nga magpakatig-a ang DOH nga tugutan ang pagpaidalom sa testing sang mga PUM kag PUI, ginakakulba ni Mayor Treñas ang posible nga matabo bangud mahimo nga magtaas pa ang kaso sang COVID-19 sa Western Visayas kag posible man nga maglawig pa ang pagpatuman sang Enhanced Community Quarantine.
Santo sa pahayag sang alkalde, indi na niya ma agwantahan ang pagpalapaw lang sang DOH sa iya mga ginahingyo.
