ILOILO CITY– Kinahanglan sundon sang mga pumuluyo ang ginapatuman nga protocol sa syudad sang Iloilo, kun may yara sang tagtaganay sang cash aid sa idalom sang Social Amelioration Program.
Ini matapos may mga nagakuha sang cash aid nga wala naga-obserba sang physical distancing.
Sa interview sang Bombo Radyo kay Iloilo City Mayor Jerry Treñas, iya ginpahayag nga strikto ang pagpatuman sang protocol agud malikawan nga maglapta ang coronavirus disease 2019.
Suno kay Treñas, indi dapat pagkalimtan sang mga pumuluyo ang pag-obserba sang physical distancing, kag paggamit sang facemask.
Pahayag pa ni Treñas, nagakadapat man nga siguraduhon sang nagapanghatag sang cash aid kag sang mga otoridad nga nagasunod ang mga pumuluyo sa protocol.
Dugang pa sang natungdan, ginahimo nila ang tanan agud masigurado nga mahatagan sang bulig ang mga nagakaigo nga benipesyaryo.
