ILOILO CITY- Nakahanda ang syudad sang Iloilo nga magdihon sang mga lihok santo man sa pagsulundan sang Regional Inter-Agency Task Force, para sa igapatuman nga Modified General Community Quarantine humalin sa Mayo 16, 2020.
Sa interview sang Bombo Radyo kay Councilor Allan Zaldivar, Chairman sang Committee on Health sa Iloilo City Council, iya ginpahayag nga may mga naplastar na ang mga pagsulundan nga igapatuman apang bukas pa sila sa gihapon sa pagbatun sang mga suhestyon nagikan sa tagsa ka mga sektor sa syudad.
Suno kay Zaldivar, igapatuman ang paggamit sang facemask kag pag-obserba sang physical distancing bangud ini ang paagi agud malikawan ang paglapta sang coronavirus disease 2019.
May yara sang nagakaigo nga penalidad suno kay Zaldivar para sa mga indibidwal nga madakpan nga magalapas sa ipatuman nga ordinansa kag mahimo ipasarado ang mga establisimento nga may kapaltahan sa pagpatuman sang physical distancing kag paggamit sang facemask.
Sa bahin naman sang pagbalik sang trabaho suno kay Zaldivar, kinahanglan nga may yara sang mga medical certificates ang mga empleyado sa pagpalik sang mga ini sa trabaho, kag handa man magbulig ang syudad sa tion nga kinahanglanon ang pagpatigayun sang Polymerase chain reaction test sa mga empleyado.
Kun sektor naman sang transportasyon ang pagahambalan suno kay sa Committee Chairman, 25% lang ang pahanugutan nga magbyahe, kag kinahanglan ipatuman ang physical distancing.
Handa man ang syudad suno sa iya nga maghatag sang transportasyon sa mga pumuluyo kaangay nalang sang mga buses.
Samtang ang curfew ang magasugod las 9:00 sang gab-i tubtob las 5:00 sang aga agud maakomodar ang mga bolentero kag mahatagan ang mga ini sang tyansa nga mabaliga ang ila mga produkto.
May yara man sang regulasyon suno sa natungdan pag-abot sa mga ilimnon sa diin, indi mahimo nga mag-inom sa pampubliko nga mga lugar kag may monitoring team nga magalibot sa mga establisimento nga nagabaligya sang mga ilimnon kaangay nalang sang mga katapo sang Philippine National Police, Public Safety and Transportation Management Office kag mga opisyal sang barangay.
