ILOILO CITY – Nagsaka na sa 51 ang coronavirus disease 2019 (COVID-19) cases sa Bureau of Jail Management ang Penology (BJMP) – Iloilo City District Jail Male Dormitory.
Sa 51 ka kaso, 39 ang Persons Deprived of Liberty (PDL) kag 12 ang mga personnel.
Sa interview sang Bombo Radyo kay Jail Superintendent Gilbert Peremne, deputy regional director for administration sang BJMP Region VI, iya ginpahayag nga lakip sa mga nagdugang sa infected amo ang 10 ka mga BJMP personnel kag 1 ka PDL.
Suno kay Peremne, lunsay yara sa isolation facility sang presuhan kag nagapabilin nga asymptomatic ang mga pasyente.
Ang mga infected nga personnel ang wala naman nakapauli sa ila mga balay bangud ginlimitahan na ang ila hulag umpisa sang nagtaas ang kaso sang COVID-19 gani wala na sang dapat kahangaw-an nga close contacts.
Nahibaluan nga nag-umpisa ang outbreak sang virus sa amo nga lugar matapos isa ka 31 anyos nga preso halin sa Iloilo District Jail sa Pototan, Iloilo kag temporaryo nga nagtinir sa BJMP-Ungka ang napatay sang Setyembre 6 sa Western Visayas Medical Center kag natukiban sang Setyembre 10 nga positibo sa COVID-19.
Una naman nagpahayag ang BJMP Region VI nga magapangayo sila sang bulig sa Iloilo City Government kag iban pa nga local government units (LGUs) kun maglala pa ang sitwasyon sa BJMP-Ungka. #
