ILOILO – Nagpatigayon sang Emergency Meeting ang Regional Inter-Agency Task Force (RTF) COVID-19 kaupod sanday Iloilo Governor Arthur Defensor Jr., Passi City Mayor Stephen Palmares, kag Capiz Governor Esteban Contreras
Sa inteview sang Bombo Radyo kay Governor Defensor, iya ginpahayag nga ang katuyuan sang ila pagsinapol amo ang pagplastar sang mga tikang sa pagtapna sang nagasaka nga COVID-19 cases sa Passi City nga ginpamunuan ni DILG Regional Director Juan Jovian Ingeniero.
Ini ang kasunod sang pagpaidalom sa enhanced community quarantine (ECQ) sa syudad sang Passi umpisa sang Enero 28 tubtub Pebrero 11.
Suno kay Defensor, may yara na sang dugang nga anom nga kaso sang COVID-19 sa Passi City nga ginabug-usan sang 226 tanan ka mga active cases.
Samtang, ginpahayag ni Defensor nga ang mga lugar nga yara sa containment kag buffer zone, ukon mga kaiping nga kabanwahanan sang Passi City, ang magapabilin lamang sa ila nga quarantine classification.
Liwat man nga nagpahanumdom ang gobernador sa publiko nga magsunod sa health protocol kaangay sang pagsuksok sang face shield, face mask, physical distancing kag masami nga paghugas sang mga kamot.
