ILOILO – Natalana nga i-lockdown ang Munispyo sang Miag-ao, Iloilo subong nga adlaw Pebrero 15 tubtob sa Pebrero 28.
Ini matapos nagpositibo sa COVID-19 ang tatlo ka mga konsehal sang banwa.
Sa interview sang Bombo Radyo kay Miag-ao, Iloilo Mayor Dr. Macario Napulan, iya ginpahayag nga padayon pa nga nagasaka ang kaso sang COVID-19 sa amo nga banwa ilabi na sa mga empleyado sang munisipyo.
Suno kay Napulan, katuyuan sang lockdown amo ang pagdisinfect sang kabug-usan nga bahin sang talatapan lakip na ang sa Municipal Disaster Risk Reduction Management kag General Services Office.
Nagmando man ang alkalde sa mga empleyado nga magsunod sa istrikto nga home quarantine.
Magawork from home naman ang regular nga mga empleyado sang munisipyo nga na-assign sa essential services kaangay sang pagproseso sang importante nga mga dokumento.
Pahayag ni Napulan, nag-ugat ang pagtimbuok sang mga kaso sang COVID-19 sa munisipyo umpisa sang nagligad nga bulan sang Enero, sa diin madamo sang nagatambong nga mga bisita.
Didto na nag-umpisa suno sa iya ang paglatnanay sa nasambit nga virus.
Dugang pa sang natungdan, ipaidalom sa 14 days home quarantine ang tanan nga empleyado sang munisipyo samtang nagapadayon pa ang contact tracing.
