ILOILO CITY- Ginpatpat sang regional director sang National Police Commission Regional 6 ang pila sa mga posible rason kon ngaa natabo ang misencounter sa tunga sang Philippine National Police kag Philippine Drug Enforcement Agency sa Commonwealth Avenue sa Quezon City sa diin duha ka pulis ang patay.
Sa interview sang Bombo Radyo kay Atty. Joseph Celis, iya ginpahayag nga posible nga wala sang koordinasyon sa tunga sang duha ka ahensya may kaangtanan sa anti-illegal drug operation.
Ini matapos naggwa ang impormasyon nga naglunsyar ang Quezon City Police District (QCPD) District Special Operations Unit (DSOU) sang buy-bust operation malapit sa Ever Gotesco Mall apang wala sang ihibalo ang DSOU operatives nga ang ila ka-transaksyon ang mga Special Enforcement Service (SES) agents sang PDEA.
Suno kay Celis, magluwas sa kakulang sa koordinasyon, posible nga may yara man sang iban nga tawo nga involved sa operasyon ang may interes sa kwarta ukon sa druga.
Dugang pa niya, posible nga may natabo man nga pagpatalang sa mga impormasyon angot sa operasyon rason nga natabo ang misencounter.
May kaangtanan sa rules of engagement sa kasubong nga operasyon, ginpahayag sang natungdan nga indi malipod nga kon kaisa, nagakalipat ang mga agents sang PDEA sa mga basics.
Suno sa iya, sa bahin sang Philippine National Police, may standard gid nga ginasunod ang tanan kag kon frame of mind, outlook ,kag perception ang istoryahan, mas abanse ang PNP.
