CALINOG,ILOILO – Nagapadayon pa ang imbestigasyon sang mga otoridad tuhoy sa pagluthang-patay sa kontrobersyal nga Punong Barangay sang Roosevelt, Tapaz, Capiz.
Sa exclusive interview sang Bombo Radyo kay Police Captain Genesis Roque, hepe sang Calinog Municipal Police Station, iya ginpahayag nga ginluthang si Punong Barangay Julie Catamin sa Brgy. Malitbog Centro, Calinog, Iloilo.
Nagasakay si Catamin sa motorisklo kag pauli na kuntani sa Tapaz, Capiz sang ginluthang-patay sang riding in tandem suspects sa likod nga amo ang gintunaan sang iya kamatayon.
Pebrero 25, ginpatawag naman si Catamin sa kampo sang 61st Infantry Battalion (IB) sa Brgy. Libot, Calinog, Iloilo kag ginpaandaman nga indi magpangayo sang bulig sa mga Bayan Muna lawyers kag sa Simbahang Katolika.
Si Catamin ang nainterview naman sang Bombo Radyo Iloilo matapos ang insidente sa diin ginpanindugan sini nga ginplantedan sang mga otoridad ang iya mga pumuluyo.
