Magabalik na ang operasyon sang Municipal Hall sa banwa sang Dumangas, Iloilo matapos ginlockdown kag ginsirado sang Abril 12 tubtob 16 kasunod sang pagpositibo sa COVID-19 sang pila ka empleyado.
Sa interview sang Bombo Radyo kay Mayor Ronaldo ‘Onal’ Golez, iya ginpahayag nga padayunon na ang tanan nga transaksyon sa nasambit nga munisipyo bwas nga adlaw, Abril 19 apang patigayunon ang skeletal force sa mga empleyado nga indi high risk sa COVID-19.
Ini bangud padayon pa sa pagsaka ang kaso sang COVID-19 sa diin nadugangan pa sang masobra 30 ang nagpositibo sa COVID-19 nga mga empleyado kasunod sang asud-asud nga swab testing sa mga close contact.
Ginpahayag sang alkalde nga ang tanan nga COVID-19 positive nga employees ang lunsay asymptomatic kag istrikto nga nakaquarantine sa diin estable man ang ila kondisyon.
Nagpanawagan man ang opisyal sa publiko nga hatagan sang istrikto nga igtalupangod ang pagsunod sa tanan nga minimum health protocol agud makalikaw sa COVID-19.
