Buhinan ang circulation sang mga tawo sa Iloilo Province.
Ini ang kasunod sang ginpapanaog nga Executive Order No. 163 ni Iloilo Governor Arthur Defensor Jr., sa diin ginadumilian ang operasyon sang facilities sa tourism, recreation, kag accommodation establishments sa probinsya kag amo man ang swimming sa public beaches kag inland water umpisa bwas, Mayo 22 nga magalawig tubtob Mayo 31.
Sa interview sang Bombo Radyo kay Defensor, iya ginpahayag nga sakop sang pagsulundan nga iya ginpirmahan, ang pagpauntat ang operasyon sang cottages, swimming pools, playgrounds, game rooms, function rooms, dining halls, bars, kag dance halls, amusement parks, ecological parks, hotels tourist inns, motels, pension hotels, condotels, apartment houses, beds kag breakfast establishment.
Ginlimitahan man sa 50% ang seating capacity sa dine-in service sa restaurants, fast food chains, kag food stalls.
Suno kay Defensor, nagakadapat nga limitahan anay ang numero sang mga tawo nga masami nga nagatumpok sa mga tourism establishments kag destination sa probinsya agud mapunggan ang paglatnanay sang COVID-19.
Apang pasugtan naman nga magpadayon sa operasyon ang lodging services kag boarding houses lakip na ang ila kitchen kag restaurant agud ma-akomodar ang mga authorized persons outside residence (APOR), returning overseas Filipinos kag returning residents sa probinsya.
Samtang, ginpasigurado ni Defensor sa publiko nga mahibalu-an sa gihapon sang isa ka indibidwal ang brand sang bakuna nga itublok sa iya sa tion nga makadesisyon ini nga magpaidalom sa COVID-19 vaccination.
Ini ang kasunod sang proposal nga indi na pag-i-anunsyo sa publiko ang brand sang COVID-19 vaccine nga i-inject sa mga pumuluyo.
Pahayag sang gobernador, antes ang inoculation, may patigayunon nga counseling, sa diin diri mahibaluan sang isa ka indibidwal ang brand sang bakuna nga itublok sa iya antes paman ini nga bakunahan.
