Nagapangayo sang kooperasyon, paghangop kag pasensya sa mga pumuluyo ang alkalde sang syudad sang Iloilo.
Ini ang kasunod sang mga pagpanghangkat nga gina-atubang sang tanan matapos ginpalawig ang modified enhanced community quarantine (MECQ) status sang Iloilo City sa Hunyo 15.
Sa interview sang Bombo Radyo kay Iloilo City Mayor Jerry Treñas, iya ginpahayag nga sa subong nga mga tinion, nagakadapat unahon sang tanan ang pagbululigay sa pihak sang kabuldlay nga dala sang pagsurge ukon pagtimbuok sang COVID-19 cases sa syudad.
Suno kay Treñas, may mga inisyatibo man nga ginaobra ang Iloilo City Government agud maka-extend ukon makahatag sang bulig kaangay sang pagpanagtag sang relief goods sa mga tuman ka apektado sang MECQ.
Ginatinguhaan man suno sa alkalde nga mabuligan pinaagi sa Tulong Panghanapbuhay sa Ating Disadvantaged/Displaced Workers (TUPAD) nga programa sang Department of Labor and Employment (DOLE) ang mga nadulaan sang trabaho sa syudad tuga sang COVID-19 pandemic.
Gin-ako ni Treñas nga indi gid kuntani niya luyag nga ipaidalom sa MECQ ang syudad bangud nahibal-an niya kun ano ini kabudlay para sa tanan.
Apang suno sa alkalde, halos wala na lugar ang mga ospital sang syudad sa pagbaton sang COVID-19 patients sa diin halos adlaw-adlaw madamo ang ginabawian sang kabuhi bangud sa amo nga virus rason nga nagakadapat nga istriktuhan ang hulag sang mga tawo agud nga mapunggan ang nagalala nga sitwasyon.
”Kun may lugar lang tani sa ospital nga butangan sang mga COVID-19 positive, indi ko magduha-duha nga ipabilin sa MGCQ ang syudad…pero bangud sa sitwasyon subong, napilitan kita nga mag-istrikto bangud nga puno nagid ang ospital kag mapatay ka nalang kun indi ka madapatan sang bulong… Gapangayo lang ko sang inyo kooperasyon.”
‘ANG PUNTA SINI TANAN BAKUNA GID’
Samtang, sa pihak sini tanan, nagapati si Mayor Treñas nga ang solusyon sa malala nga kaso sang COVID-19 sa syudad amo ang pagpabakuna batok sa amo nga virus.
Kasunod sini, wala naman untat ang COVID-19 vaccination sa Iloilo Convention Center, Ateneo de Iloilo, University of San Agustin kag Central Philippine University nga amo ang lunsay ginagamit bilang vaccination centers sang syudad.
Ginpahayag ni Treñas nga nagpromesa naman si Vaccine Czar Secretary Carlito Galvez Jr. sang dugang pa nga donasyon sang COVID-19 vaccines sa Iloilo City.
Padayon man ang paghire sang syudad sang dugang nga mga nurse kag nursing aide.
Dugang pa sang alkalde, sa tion nga mabakunahan na batok sa COVID-19 ang kadam-an sang mga Ilonggo lakip na ang tanan nga frontliners, ginalauman nga mag-untat na ang pagsaka sang COVID-19 cases.
