ILOILO CITY- Naglab-ot na sa kapin P192,000 ang nakolekta sang Iloilo City Government gikan sa violators sang Regulation Ordinance #95 ukon non- wearing/ improper wearing of facemask/ faceshield kag Regulation Ordinance #66 ukon non-observance of physical distancing.
Sa interview sang Bombo Radyo kay Mr. Nestor Canong, head sang Compliance Team sang syudad, iya ginpahayag nga ang ini nga koleksyon ang naggikan sa mga violators nga nagbayad sang ila monetary penalty umpisa sang Enero tubtob Hunyo subong nga tuig.
Suno kay Canong, ang mga violators naman nga wala sang ikasarang nga magbayad sang multa ang may alternatibo nga penalidad nga amo nga community service.
Ginpahayag ni Canong nga sa 225 ka mga violators nga gin-isyuhan sang citation ticket sa period nga Hunyo 1-17, 16 sa ila ang nagrender sang community service sa diin gin-require ang mga ini nga magtrabaho sang walo ka oras nga pagpaninlo sa mga plaza kag esplanade.
Nagpaandam naman si Canong sa iban nga violators nga wala ginasapak ang ila citation ticket nga mahimo sila pasakaan sang kaso.
