ILOILO CITY- Ginalauman nga mas magdagsa pa sa gym sang Olympic gold medalist nga si Hidilyn Diaz ang mga aspiring weightlifters nga handom man magsunod sa tapak sang pinakauna nga Pinay athlete nga nagdaog sang gold medal sa Olimpyada.
Sa interview sang Bombo Radyo kay Punong Barangay Leonard Aliangan sang Brgy. Mampang, Zamboanga City, iya ginpahayag nga sadto pa man, mahilig na sa sports ang kabataan sa ila lugar.
Suno kay Aliangan, bangud sa kadalag-an ni Diaz, pat-od nga mas mangin pursigido pa gid ang mga atleta sa ila lugar nga nagahanas man sa weightlifting.
Pahayag niya, ang Hidilyn Diaz Weightlifting Gym ang gintukod antes ang kompetisyon ni Diaz sa Rio Olympics sa Brazil sang 2016 kon sa diin nagdaog ini sang silver medal.
Sa subong suno sa opisyal, nagahanda na sila para sa pagpauli ni Diaz sa iya dutang natawhan sa tion nga matapos ang iya seven- day mandatory quarantine matapos nagpauli sa Pilipinas kahapon.
