Ginpaidalom sa lockdown ang Barangay Salvacion, Nueva Valencia, Guimaras umpisa subong nga adlaw, Agusto 15 tubtob 22.
Ini ang santo sa ginpapanaog nga Executive Order No. 35 ni Nueva Valencia Mayor Emmanuel Galila.
Sa exclusive interview sang Bombo Radyo kay Municipal Disaster Risk Reduction Management Officer Loren Gallarda, iya ginpahayag nga ini nga tikang ang kasunod sang narekord nga masobra 50 ka kaso sang COVID-19 sa nasambit nga barangay matapos nagpositibo sa virus ang isa ka pamilya.
Bangud sini, hugot nga ginapatuman ang ‘Stay at Home Policy’ sa diin ipatuman man ang curfew humalin las 8:00 sang gab-i tubtob las 5:00 sang aga.
Gin-augment na ang pila ka force multipliers kaupod ang barangay officials agud ipatigayon ang checkpoint sa barangay.
May igapanagtag man nga relief goods sa kada puluy-an.
Suno kay Gallarda, nagsaka naman sa 108 ang kaso sang COVID-19 sa bug-os nga banwa sang Nueva Valencia, as of August 14.
Nagpangabay ang natungdan sang kooperasyon kag paghangop sang pumuluyo.
