Nakaptan na sang Iloilo City Government ang kapin P2.1 Million nga pondo nagikan sa Department of Health (DOH) para sa Special Risk Allowance (SRA) sang eligible health workers sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga ginahitso na subong sang syudad ang tanan nga payroll.
Na-umpisahan naman subong panagtag ang SRA.
Ginpat-od man sang alkalde nga bag-o matapos ang ini nga semana, posible nga tapos na ang pag-release sang nasambit nga allowance.
Nahibaluan nga ang amo nga SRA ang para kuntani sa Disyembre 2020 tubtob Abril 2021 apang subong lang nga bulan sang Agusto nabaton sang health workers sang Iloilo City nga una nagwangal sa delayed nga sistema sa pag-release sang ila COVID-19 hazard pay.
