ILOILO CITY- Ginkumpirmar ni Sen. Risa Hontiveros nga in- contact sa gihapon sa pila ka mga indibidwal ang Pharmally Pharmaceutical Corp. executive nga si Krizle Mago nga una na nga na-report nga out of reach matapos nag-testify sa Senado.
Sa interview sang Bombo Radyo kay Sen. Hontiveros, iya ginpahayag nga kasunod sang pagbuyagyag ni Mago sang natabo nga tampering sa face shields nga gin-supply sang Pharmally sa gobyerno, wala pa ini nakapakig-angot liwat sa Senate blue ribbon committee.
Apang, gin-athag niya nga base sa nabaton niya nga impormasyon, nagapakig-angot si Mago sa pila ka mga grupo kag safe sa gihapon ini tubtob subong.
Nagpasalig naman si Hontiveros kay Mago nga bukas ang iya opisina kag ang Senate blue ribbon committee agud maghatag sang proteksyon sa iya.
Una na nga nagtanyag ang panel sang security para kay Mago apang nagsabat siya nga panumduman anay niya ini.
Nagalaum naman ang senadora nga mas mangin bukas si Mago sa pagbuyagyag sang dugang nga kamatuoran kag magkooperar sa palaabuton nga hearing sa Huwebes, Septyembre 30.
Nahibaluan nga ginaimbestigahan ang Pharmally bangud sa pagkuha sini sang masobra P8 billion nga kontrata para mag- provide sang medical supplies sang nagligad nga tuig apisar may yara lang ini sang P625,000 paid-up capital.
Sa tion naman nga indi na liwat magpakita si Mago, ginpahayag ni Hontiveros nga mabug-at na ang testimoniya nga iya ginbuy-an kag amo man ang iya sworn statement nga makabig nga mapag-on nga ebidensiya.
