Gin-athag ni former 4th District Rep. Dr. Ferjenel Biron nga wala niya ginpilit nga mag-intra sa Nacionalista Party si former SB Member Jess Dimafiles.
Ini kasunod nga ginsapubliko ni Dimafiles nga ini ang gindagdag sang Nacionalista Party bangud ang ginasuportahan sini nga Presidential candidate amu si Vice President Leni Robredo.
Nahibaluan nga suportado sang amu nga partido ang kandidatura nanday fomer Senator Ferdinand Bong Bong Marcos Jr kag Davao City Mayor Sara Duterte Carpio.
Sa interview sang Bombo Radyo kay former 4th District Rep. Biron, iya ginpahayag nga si Dimafiles ang nagpangabay sa iya nga ipasulod ini sa Nacionalista Party.
Suno kay Biron, sang gin-anunsyo sang Nacionalista Party ang ila nga pag-endorso kay Marcos kag Duterte-Carpio, ila na nadiskusyunan nga untaton ang posting ukon pagpakita sang suporta sa iban pa nga presidential kag vice presidential candidates.
Ini suno sa natungdan ang makabig na kuntani nga “political common sense” nga kun may yara na sang desisyon ang partido, kinahanglan ini nga sundon sang mga myembro.
Bilang respeto sa kaugalingon para kay Dimafiles, mas maayo suno kay Biron nga mag-resign ini sa partido apang wala man nila gin-ekspektar nga iya iga-withdarw sini ang iya kandidatura.
Gin athag man ni Biron nga kinamatarung ni Dimafiles kun sino ang iya nga suportahan apang indi lang sa idalom sang Nacionalista Party.
