Ginreklamo ni Jordan SB Member Eros Elevencione ang Guimaras Provincial Government bangud sa gihapon ginalimitahan ang hulag sang mga unvaccinated individuals nga magwa-sulod sa ila probinsya.
Sa interview sang Bombo Radyo kay Elevencione, iya ginpahayag nga kaangay nalang kuntani sa mga vaccinated ang treatment sa mga unvaccinated individual bangud man sa paghalug na sa COVID-19 restrictions.
Nahibaluan nga yara na sa Alert Level 1 status ang probinsya sang Guimaras.
Kinahanglan suno sa iya nga respetuhon ang desisyon sang mga tawo nga indi magpabakuna batok sa COVID-19.
Suno sa natungdan, kaangay sa iya nga may yara sang history sang nagkalain-lain nga masakit, hugot ang iya pagpati nga indi magpabakuna bangud sa posible malain sini nga epekto sa iya nga lawas.
Dugang pa niya, apisar nga nagpagwa sang bag-o nga pagsulundan ang Probinsya nga ginatugutan ang essential travel sa mga unvaccinated individual, indi ini klaro para sa ila kun ano lang ang makabig nga “essential” ukon importante.
Ini daw kaangay lang suno sa iya nga kinahahanglan sa gihapon nga aprubahan sang gobyerno ang ila pagwa-sulod sa Guimaras apisar sang mas halug na nga COVID-19 restrictions.
Nagpaathag naman ang Guimaras Provincial Government nga nagapabilin nga ginadumilian ang pagwa-sulod sang mga unvaccinated individuals sa probinsya sang Guimaras magluwas kun ini ang makabig nga ‘essential travel’.
Sa interview sang Bombo Radyo kay Guimaras Vice Governor Atty. John Edward Gando, iya ginpahayag nga bangud yara na sa Alert Level 1 status ang Probinsya kag base sa bag-o nga Executive Order (EO) No. 15 nga gin-issue ni Governor Samuel Gumarin, gin-expand pa ang pagsulundan para sa mga unvaccinated individual.
Base EO sang Guimaras Governor, ang mga rason nga pahanugutan ang paggwa- sulod sang mga unvaccinated sa probinsya sang Guimaras amu ang; medical reason, necessary ukon essential purpose kag iban pa nga makabig mapuslanon para sa Guimaras Provincial Government.
Kinahanglan suno sa natungdan nga maintindihan sang mga tawo nga tuyo lang protektahan sang probinsya ang ila mga pumuluyo.
