Gin-ulan sang bulig ang mga biktima sang sunog nga nagluntad sang Marso 11 kag naglamon sa masobra 60 ka mga pamalay sa Barangay Old Airport, Mandurriao, Iloilo City.
Base sa pinakaulihi nga data sang Iloilo City Social Welfare and Development Office (CSWDO), nagdangat sa kabug-usan nga 93 ang mga apektado nga pamilya.
Sa mga pamalay, 45 ang totally burned kag 18 ang partially damaged.
Sa interview sang Bombo Radypo kay Junah Alidron, officer III sang Iloilo City Social Welfare and Development Office (CSWDO), iya ginpahayag nga madamo na sang mga used clothing, food packs kag mga gamit sa balay ang nabaton sang tagsa ka pamilya.
Suno kay Alidron, nagakinahanglan sang mga inner wear ang pila ka mga residente ilabi na ang mga kabataan.
Nagapangayo man sang tsinelas ang mga apektado nga mga indibidwal.
Suno sa natungdan, mahimo nga makig-angot sa CSWDO ukon sa Barangay officials sang Barangay Old Airport, Mandurriao ang mga may tuyo nga magpalab-ot sang bulig.
