ILOILO CITY – Ginaduso sang labor group nga General Alliance of Workers Association (GAWA) nga pasakaan ang sweldo sa P95 tubtob P100 sa Western Visayas.
Ang minimum wage para sa commercial kag industrial sectors sa rehiyon ang naglab-ot sa P395.
Sa interview sang Bombo Radyo kay Mr. Winnie Sancho, Secretary General sang GAWA, ini ang nakit-an nga immediate economic relief para sa mga workers sa rehiyon 6 bangud sa nagapadayon nga pagsaka sang presyo sang produktong petrolyo.
Dugang pa ni Sancho, kun indi pagpasaka-an ang sweldo, mahimo nga mag-collapse ang purchasing power sang mga mamumugon ukon ang financial ability nga makabakal sang produkto ukon serbisyo.
Bangud sini, ang ginahimo sang grupo amo ang mag-demand sang dugang nga sweldo.
Sang Nobyembre 2019 pa ang pinakaulihi nga pagsaka sang sweldo sa Western Visayas kag bangud sini, mahimo na sila nga makahimo sang motu propio nga nagaduso sang wage hike apisar wala sang pormal nga petition halin sa labor group.
Sa Marso 21, magasapol ang labor group sa Regional Tripartite Wages and Productivity Board kaupod ang Department of Labor and Employment (DOLE) kag iban pa nga ahensya sang gobyerno matapos nga nagpasa sila sang workers’ manifesto sa DOLE-Region 6.
