ILOILO CITY – Kadungan sang padayon nga pagsaka sang presyo sang liquefied petroleum gas (LPG), nagsaka man ang presyo sang uling sa syudad sang Iloilo.
Sa interview sang Bombo Radyo kay Alyas Agnes, nagabaligya sang uling sa Iloilo Terminal Market, iya ginpahayag nga nagtaas ang presyo sang uling bangud nagsaka man ang bayad sa naga-deliver.
Ang presyo sang isa ka sako nga uling ang naglab-ot sa P390 samtang ang isa ka bugkos sang kahoy sang sibukaw ang nagabalor sang P35 kag P100 ang tatlo ka bugkos.
Suno kay Agnes, lauman pa nga mataas ang presyo sang kahoy kag uling kun padayon man ang pagsaka sang presyo sang LPG.
Dugang pa ni Agnes, apisar nga nagatas ang presyo sang kahoy, madamo sa gihapon ang nagabakal.
Samtang, nagbakal sang uling si Fortunato Denilla Jr. agud makakinot sang paggamit sang liquefied petroleum gas (LPG).
Suno kay Denilla, ang LPG ang gamiton na lamang nila sa tion nga ginadali-an ang ginaluto.
