ILOILO CITY – Naglab-ot na sa 109 ka mga indibidwal sa Western Visayas ang nadakpan nga nagbayolar sang Comelec gun ban.
Sa data sang Police Regional Office (PRO VI), as of March 16, may 13 nga nadakpan nagikan sa Aklan, tatlo sa Antique, tatlo sa Capiz, duha sa Guimaras, 19 sa probinsya sang Iloilo, 43 sa Negros Occidental, 11 sa syudad sang Iloilo kag siyam sa Bacolod City.
Sa interview sang Bombo Radyo kay PLt. Col. Arnel Solis, spokesperson sang Police Regional Office (PRO VI), nagapadayon ang pagpatigayon sang Comelec checkpoint sa bilog nga rehiyon.
Suno kay Solis, kalabanan sa mga nadakpan nga nagalapas sang gun ban ang resulta sang operation sang kapulisan kun sa diin, ginareklamo ang mga ini nga nagamaoy sa ila nga lugar.
Samtang, padayon man ang pagpakig-angot sang kapulisan sa Comelec region VI.
Sa tion naman sang kampanya kag kung may nakita ang pulis nga nagadaho sang sobre, magapatigayon sang verification ang PNP kun bala ano ang unod sang sobre kag purpose sang paghatag sini.
Sa 44 ka mga areas of concern nga una na nga ginpahayag sang PRO VI, sa subong, wala pa sang may na-classify nga hotspot area kag wala sang banwa nga may na-monitor nga may mainit nga political rivalry.
Wala man sang may na-monitor nga kandidato nga involve sa illegal drug operation nga maangot sa operation sang kapulisan kun sa diin, dalagko nga bulto sang droga ang na-recover.
Nagpasalig man si Solis sa publiko nga handa ang kapulisan sa security preparation kag handa nga magbulig sa tion nga kinahanglan ang mga ini.
