Ginaduso sa Iloilo Provincial Government nga ipatuman ang total ban sa pagsulod sang poultry products kaangay sang balut okon table eggs, dressed chicken kag iban pa halin sa Luzon agud nga makudalan ang poultry industry sang probinsya batok sa avian influenza ukon bird flu.
Ini nga bird flu ang na-detect na sa pila ka bahin sang Luzon kag amo ang ginakahangaw-an sang poultry owners sa Iloilo Province.
Sa interview sang Bombo Radyo kay Iloilo-Bacolod Association of Veterinary Sales Representatives (IBAVSR) president Maria Fe Sy, iya ginpahayag nga madasig ang paglaton sang bird flu kag nagadakapat ang pagpatuman sang total ban bangud indi man garantiya ang disinfection lang sa mga produkto.
Ginkwestyon man ni Sy ang pila ka bahin sang Memorandum Circular No. 6 nga ginpaguwa anay sang Department of Agriculture (DA).
May mga loopholes suno kay Sy kaangay sang procedure sang ultraviolet light disinfection sa pantalan nga ginhalinan.
Sa guidelines, nakasaad nga may quarantine officer nga magapa-guwa sang certification nga amo ang makapamatuod nga nakaagi na sa disinfection ang salakyan.
Rason naman ni Sy, may tyempo gid nga nakadapat para sa UV light disinfection kag dapat man pasiguraduhon nga babaw-dalom ang gina-disinfect.
SABAT SANG PROVINCIAL GOVERNMENT
Nakasapol na ang Iloilo-Bacolod Association of Veterinary Sales Representatives kanday Iloilo Provincial veterinarian Dr. Darel Tabuada, Governor Arthur Defensor, Jr., kag mga tiglawas sang DA Region 6.
Apang sa interview sang Bombo Radyo kay Tabuada, iya ginpahayag nga may mga ginakonsiderar pa ang probinsya — kaangay sang mangin epekto sa ekonomiya sang Iloilo kun hinali nga ipatuman ang total ban.
Rason ni Tabuada, ginasunod lang anay subong ang Memorandum Circular No. 6 sang DA kag ginpahangop man sini sa pribado nga sektor nga indi insigida nga mapatuman ang total ban sa Luzon poultry products.
Masapol pa ang probinsya sa iban nga concerned agencies agud nga mahibalo kag mabalanse ang demand kag produksyon sa Iloilo.
Ang task force nga gintukod sang Iloilo nga magbantay sa nagasululod nga poultry products sa probinsya amo man ang African Swine Fever Task Force nga nagapasigurado nga bantay-sarado ang entry points sa probinsya agud nga makudalan ang swine industry.
